ليه القمر ما يتيتمش؟؟
فرشة وفرشة وألوان...بص حواليه وكانه بيدور على حاجة ضايعة...مد إيده وخد اللون الأبيض.
" حاحاول افتحها شوية " قال لنفسه...وكمان قال : " عينيها...فى لمعة كده لما بتيجى تضحك ، ولمعة لما تحزن ، ولمعة لما بتبقى عارفة انى كذاب ومش عايزة تحرجنى ...حتوحشنى "
لما الفرشة بتمزج اى لون مع الأبيض بيحس ان الدنيا دارت بيه..بيدوخ...وكان اعجاز اللون ودوبانه دوبان لروحه..بيبقى حتة من كون وكيان ابعد من حدود انسان أكل ونام واشتهى وقام...كأن بُعد اللون عالم تانى...مد بفرشته خط فى وسط اللوحة وقال :" خطوط ملامحها كانت عاملة كده ليه؟ كانت تعبانة؟؟ طيب ما قالتش ليه ؟ الخط اللى جنب عينيها كان مبتسم دايماً لكن كان بيئن سمعته صدى من بعيد قلت اكيد بيتهيألى..ريحت نفسى وطنشت! "
الأبيض نَوَر اللوحة أوى...بيحتفل...هو اللون فى ذاته إحتفال..بالحياة ومنتهى منتهاه انه يزغلل عينين الناس عن نقار مرات صاحبى أو وقوف فى صف طويل...خناق على لقمة عيش أو مواصلة مستنى ...يبص يمين يلاقى إعلان فيه شابين ..ضحكتهم ليها رنين صامت مسموع و ألوان ورتوش بتنادى وتصرخ ع الجنيهات...بتقول إصرفها هنا و عيش سعيد ..ما هى السعادة فى الألوان...والجنيهات ميت حجم ولون ...
اللون الأزرق كان فى إيده ..ضغط ع الأنبوبة وحط كتير " حاملاها أزرق...زى شالها الكبير اللى حضنها بدالى ودفاها مكانى و غطاها ليالى ...وأنا كان مالى؟ كنت فين ؟ يوم الإتنين كنت مع الواد صاحبى وصاحبه وصاحبه التانى...اتعشينا وكانت ليلة ...اكيد وانا بضحك هناك كانت موجوعة ...اكيد وانا بغازل البنات كانت ماسكة فى المخده من ألم حاد ..سكين ...أكيد وأنا بحاسب كانت بتحاسب عشان متوقعش وهى رايحة للتليفون تطلب نجدة...
اللون خف كده ليه...هى دموع نزلت دمعة دمعة على الباليت سيحت الألوان...هى سخونة الألم والدموع بتأثر فى الإنسان؟ هو اللى حاسس بالحرقة ممكن يحرق الألوان والفرش والحيطان؟؟
رسم نص دايرة والخط فى نصها...والخلفية سما زرقا وبحر داخل فيها ..ماليها...كأن البحر ممكن يطلع فى السما ويفضل بحر...كأن السما حتسمح يملاها الموج ..كأن النجم ممكن يتبدل أخطبوط ..كأن القمر حيبقى من غير صوت...مكتوم...غريق من غير هوى وعشاق...من غير ضوء!!!
بص للوحة والسما بتطوف فى بحر عميق..وقال " معقولة بردو...ما دامت هى طلعت فوق ليه البحر ما يطلعش ؟ ما دام وقعت وراحت واتبددت وصارت عدم...من غير دفا ولا قدم...ما دمت بقيت وحيد من غير أم....ليه القمر ميتيتمش والحزن يعم ؟؟!!!
تعليقات
Gameela awy
and thanks for being my faithful reader :)
happy new year :)
انه اذا اتيتم
قمر الزمان البيض
هيعوضك وتحس
انك بقيت زيه
طب تفتكر يعني
لو السما فيها بحر
هيكون بقى ازرق
وميته مالحه
كما البحور في الأرض
ابدا مهوش مالح
ده هي عايشه فوق
في بحيرة من فضه
تبرق بنور صافي
وهي قاعده هناك
مبتسمه وبراحه
شايفاك بتتندم
على بعدها يا تايب
فرحانه برجوعك
تتمنى تندهلك
علشان تأكدلك
ما تخافش يا طفلي
انا هنا في جنه
بعيد عن الدنيا
-------------------
بس بقى علشان القصه جامده قوي وانا مش عارف اقول ايه
سلاااااااااااااااااااام
لو السما فيها بحر
هيكون بقى ازرق
وميته مالحه
كما البحور في الأرض
******
ارتجال كمان فورى...كله الا ده...بجد برافو.
:)