ابا عن اخ !!

انا طلعت الطبال..اشهر مين رَقَص صاجات!!

آه..بيقولو كده عنى على قهوة الآلاتيِه..

مانا مشهور اوى اوى بين الفرق..

محسوبكو واخدها ابا عن اخ..مش كده و خلاص..لا ..مأصَل..

اشتغلت فى افراح الدرب الاحمر و شوادر غيط العنب..كمان طبلت فى اجدعها فنادق فيكى يا مصر..

حتى لما الست سهير فؤاد و الست نجوى ذكى كانو يعوزونى اسافر معاهم كنت باسافر بلاد بره..فرح اميره و لا عيد ميلاد شيخ..

متم..فين ايام الاسترلينى و الفرنك اما كان بجنيه و نص..كانت ايام آخر نغنغه

حتى اللغات رطناها..

كنت بتكلم فارانصاوى اجدع من اى واحد معاه شهاده..و انا لا مؤاخذه ما بفكش الخط..ابويا معلمنيش خالص..

حتى البت الفارانصاويه اللى اسمها دومونييك دى كانت بتموت فيا..

و الواد صبرى الرقاق يقوللى:

"انا مش فاهم بتحبك على ايه!!!"

اكمنى اسمر اوى يعنى و اصلى نوبى..

هع هع هع..(نفس شيشه عميق كاد ان يثقب فتحات منخاره ليحولهما الى اربع)

منك لله يا بن الجزمه يا سيد يا رفعت.الواد الناياتى الإيحه خطف منى البت

الواد ده كان متجوز اتنين..واحده بت خالته و التانيه كانت فى الكورال بتاع الشيراتون..و خلِف من الاتنين..انما ايه..قمرات و مربربين كده و حاجه تفرح..مش زى ست ابوها اللى ربنا بلانى بيها..

الا ما فى مره ادخل البيت بعد الفجر و انا مصهلل و عامل دماغ الا و الاقيها نايمه بتشخر..و لا عليها كلاحه..يا ساتر يا رب..

احلى حاجه فى حياتى لما كل الفرقه هس هس و انا اطبل بمزاج لوحدى..حته سولون كده انما مزييكا..

امال يعنى صوابعى مقطعه كده من ايه..مانا بطبل باعصابى..كانت سواعى تشلب دم من كتر الحماسات اللى بحسها و الرقاصه تلف تلف و الناس فى الصاله تصقف و ايييييه..

و لا لما الريس بتاع امريكا جه خد الصاله ليه لوحده عشان سمع عن ساره حمدى..

الراجل كان حيقع من طوله من كتر ما عجبه الشغل..

فيه تصويره باين معايا فى البيت..

( رشفة شاى حبر من الكوب العتيق الذى لابد و ان لامس شوارب آلاتيِة مصر كلهم)

هى الدنيا زحمة النهارده اوى كده ليه..الناس ناقص ترَفَع التكوسه عشان تركبها و تروح اشغالها..

يا سلام لو مصر فيها صابنواى زى لندن كده..كان زمان الدنيا حلوه اوى..

الصابنواى ده قطر تحت الارض لامم ناس ياما..بدل الزحمه و الخناق و الوساخه بتاعة العالم دى..

بقولك ايه يا ست..

ما تبوصيلى هنا..

الا حطيتى المسجل ادامى و مصدره لى......افاكى و سايبانى قاعد اكلم نفسى..

طب و الله مانا قايل حاجه تانى

ده حاجه تنقط!!!